المساعد الشخصي الرقمي

مشاهدة النسخة كاملة : حكم الخروج مع جماعة التبليغ والدعوة للشيخ ابى اسحاق حفظه الله



م أ ي
07-12-10, 05:12 PM
حكم الخروج مع جماعة التبليغ والدعوة
الشيخ أبو اسحق الحويني – حفظه الله –
فتوى صوتية مفرغة



سؤال يتكلم عن الخروج مع جماعة التبليغ والدعوة ، يقول إن كان لا يجوز فأجب بالتفصيل ؟! فطبعاً إحنا فصلنا هذا الأمر مراراً وتكراراً ، ولذلك أقول لصاحبنا الذي أرسل هذا السؤال اصبر شهرين أو ثلاثة تحضر الدرس هنا إن شاء الله وبعدين اكتبلي تقرير في نهاية أمرك هل يمكن أن تخرج أم لا ؟


أنا أقول (( بالفم المليان )) أهو وبقول بقالي 25 سنة من يوم معرفت جماعة التبليغ والدعوة ، الجماعة دي متدثرة ببدع لا أخر لها ، الخروج عندهم ركن ، لا تتم الجماعة إلا بهذا الركن وهذا الركن بدعة فما بالك بما هو دون الركن من الواجبات والمستحبات وما دون ذلك ، إذا كان الركن أساس الذي يرتكنون عليه بدعة !!!


إحنا بنقول يا جماعة الصحابة كانوا يخرجون ، هو أنا مبخرجش ؟! هو أنا لما خرجت من بيتي وجيت الجامع هو ده مش خروج ؟! هو أنا لما خرجت من بيتي ورحت القاهرة هو ده مش خروج ؟! هو أنا لما خرجت من بيتي ورحت مثلاً أي بلد من بلاد أوروبا ولا البلاد العربية هو ده مش خروج ؟! أه ، إنما خرجت لأُعلم ، هو خرج يعمل إيه بقا ؟! هو راجل بيقول إحنا مش علماء ومبنعرفش حاجة في العلم وإحنا جهلة ، الحق يقال : هم صادقون ، يعني هما معترفين بالمسألة دي وهم لا يكذبون ، ويقولك إحنا ناس جهلة ، تمام.


طيب إنتا لما إنتا جاهل طالع تقول إيه ؟! تقول لصاحبك – وده حقيقة حصلت – اتنين رايحين بلد عمرهم مدخلوها فالجماعة قالوا يا جماعة روحوا هاتولنا جبنة شوفوا أي بقالة هاتولنا جبنة وفول والكلام ده ، فواحد ماشي مع واحد صاحبه داخوا في الشوارع مش لاقيين بقالة فواحد قال لما أسأل دهوا ؟ قاله : لأ ، وإذا سألت فاسأل الله !!!


طيب ده لو عنده أي قدر من العلم كان ممكن يقول الكلمة دي !! طيب أنا معاك هتقول إيه ؟!! بقالة يارب !! هيقول إيه ده ؟!! لو أنا عايز أنفذ الكلام بتاعك ( وإذا سألت فاسأل الله ) أعملها إزاي دي ؟!


السؤال مباح للضرورة زي سؤال الجاهل لأهل العلم أه ، النهاردة ده راجل معندوش أي حاجة عشان كدة خرج جوابه على مقتضى هذا الجهل إحنا بنقوله تعالى اتعلم الأول ، والله ما عايزك تبقى سلفي يعني تبقى تبع السلفيين ، السلفيين مش جماعة ، مش حكاية إني مش عايزه يبقى سلفي ، يعني مش عايزه يبقى في الجماعة السلفية هو متصور إن السلفيين لهم جماعة !!! وأنا كدة بخطفه من جماعة التبليغ مثلاً وأحطه في الجماعة السلفية ، لا السلفيين ليسوا جماعة السلفيين منهج ولذلك هي تسع كل المسلمين ولا تجد عندهم تعصباً مثل الجماعات الأخرى التي لها إطار محدود إذا دخلت في الإطار تبقى منهم خرجت بره تبقى مش منهم !! لا ، فأنا بقله تعالى إتعلم واخد المسألة دي بحساسية بالغة فاكر إني أنا عايز أضمه ليا !! طيب أنا يعني وقلما أحلف والله يا سيدي ما عايزك صدقت !!! وأنا قلما أحلف بس تعالى اتعلم إذا قعد في الحلقة بتاعتنا دي واتعلم أنا راضي إن هو يُعمل قانون العلم بعد ما يتعلم إذا العلم قاله اخرج وأنا مش هعارضه وأنا أعلم أنه سيخرج مثل خروجي زي منا بخرج برضه ، يخرج ليُعلم ، الصحابة اللي بيحتجوا بيهم كلهم كانوا بيخرجوا بس بعد ما صاروا علماء ، هو في صحابي يوصف بجهل !! في صحابي اسمه مش عارف حاجة !! كل الصحابة كانوا علماء ، ولذلك تفرقوا في الأمصار بغية نشر العلم والخليفة عندما أراد من مالك أن يحمل المسلمين على موطأ مالك ، الإمام مالك لإنصافه رحمه الله قال : (( يا أمير المؤمنين إن أصحاب النبي http://vb.islam2all.com/images/smilies/words/Sala-allah.png تفرقوا وعند كل واحد ماليس عند الآخر فأنا ربما أكون أدركت شيئاً وغابت عني أشياء موجودة مع صحابي راح الكوفة وأنا لم أرحل إلى الكوفة فمن الظلم البين أن نحمل المسلمين على كتاب لم يجمع كل ما عند الصحابة من العلم وقد تفرقوا في كل البلاد )).


إذا كنتم كالصحابة تعلمتم وعلمكم معلم راشد عالم بالكتاب والسنة فلا بأس ، والمسألة طويلة زي علمائنا صنفوا فيها وشيخنا الشيخ الألباني رحمه الله تكلم فيها بكلام طويل وله أكثر من تلت أربع شرايط في المسألة دي والشيخ حُمُود التُويجري أحد علماء السعودية الكبار له كتاب اسمه ( القول البليغ في جماعة التبليغ ) .


وأنا يعني أتمنى الحقيقة لهم الخير وياريت بس الهالة إللي هما حطنها دي يتركوها وعندئذ سيستطعمون ما أقول لهم هما مفهمنهم إن العلم طاغوت !! والعلم صنم يُعبد !! عشان كدة كل ما يوصف بالعلم في زماننا هذا ممنوع على واحد من الجماعة أن يستفتيه !! يعني مثلاً أنا والشيخ محمد يعقوب والشيخ محمد حسان والشيخ مصطفى العدوي والشيخ محمد اسماعيل والشيخ ياسر برهامي والشيخ سعيد عبد العظيم والشيخ أحمد فريد والشيخ محمد عبد المقصود إخوانا دول كلهم محطوطين في اللستة السوداء الكلام ده حقيقي وأنا على رأسهم أنا أكتر واحد يحذرون مني بسبب الكلام الذي أقوله وأنا إنما نصحت لا أنا كسبان حاجة من جماعة التبليغ مفيش مشاكل عندي خالص ولا عملت يوماً بيوم من الأيام بقصد إني ألم جماعة أو ألم حواليا ناس ولا الكلام ده ، والله يا إخوانا أنا أهرب من الناس وبهرب من كل مكان يتجمع فيه الناس مش بلم ناس والكلام ده ، أنا عايزهم بس يطمئنوا أنا لما بقول الكلام ده مبلمش حد مش هاخد حد من عندهم ، أنا مبصليش في المساجد حتى لا أؤُم ولو عرفت إن مسجد هيخليني أصلي فيه إمام لا يمكن أن أدخله وأحياناً أصلي في مساجد لا أعرف الإمام بتاعها بيطول ولا بيقصر ولا الكلام ده ليه ؟! لأن بدخله لأول مرة !!!




فأنا عايز بس أقول لإخوانا انا مش عمال أخد من الجماعة بنحت منهم وباخد أحط عندي في رصيدي ورأس مالي لا ، وإنما أنا أدعوهم إلى علم الكتاب والسنة.


أنا لا أتعصب إن شاء الله إلا لما أعتقد أنه الحق وقامت عليه الدلائل عندي من الكتاب والسنة


انتهت الفتوى ،،

مسلم وكفى
07-18-10, 12:41 AM
جزاكم الله خيرا

مسلم وكفى
07-20-10, 06:02 PM
عندنا هذه الجماعة منتشرة وينفرون منا
رغم نشاطهم العالى فى الدعوة

ام المحدثين
07-20-10, 10:04 PM
جزاك الله خير

استفدت ولله الحمد
بارك الله فيك

م أ ي
07-26-10, 05:11 PM
بارك الله فيكم

مسلم وكفى
08-02-10, 11:00 AM
fhv; hggi td;

رضا
08-02-10, 01:38 PM
أ نصح بشريط للامام المجدد الشيخ الالباني رحمه الله كلمة حق في جماعة التبليغ

البلاغ
08-02-10, 05:55 PM
جماعة التبليغ
علماء ذموا عملهم
وعلماء مدحوهم
فمن نصدق؟؟؟؟؟؟؟

البلاغ
08-06-10, 08:36 PM
نصدق العمل الميداني

الصوت الهادىء
08-06-10, 09:59 PM
السلام عليكم ورحمة الله وبركاته

أخوتي في الله


كل العلماء الأفاضل الذين تكلموا في هذه الجماعة رأيهم على العين والرأس


ولكن أقول كلمة بسيطة وفق رأيي المتواضع من طويلبة علم حديثة العهد بالعلم الشرعي :

يعرف الرجال بالحق ولا يعرف الحق بالرجال , أي أن ما كان من هذه الجماعة وفق الكتاب وصحيح السنة وبفهم سلف الأمة بالاتباع وليس بالابتداع فأهلاً بهم وبارك الله في جهودهم

أما إن كان منهم مخالفة للكتاب أو مخالفة صحيح السنة أو ابتداع في طرق الدعوة لله أو ابتداع في الدين فلا سبيل لمناصرتهم ولا مدحهم بل الدعاء لهم بالاستقامة أولاً وذلك بتعلم هذه الأصول واتباعها بدقة بدون انحراف أو انحياز سوى لكتاب الله تعالى وصحيح السنة ثم الانطلاق للدعوة للسير على بصيرة ونور وليس على ضلال وظلمة البدعة .

هذه هي القاعدة برأيي البسيط الغير وملزم إلا لي أنا فقط للحكم على أي جماعة أو طريقة للوصول لرضاء الله تعالى ونيل الثواب والجنة , وهذا الكلام لا أرى به بإذن الله تعالى تجني أو تعدي على أحد أو التعصب لمذهب أحد , فهمنا هو الحق عن طريق الحق والدليل الصحيح

أختكم في الله الصوت الهادىء

أستودعكم الله الذي لا تضيع ودائعه

م أ ي
08-16-10, 01:37 AM
بارك الله فيكم